Google+ Badge

Monday, 21 September 2015

மொட்டைப் பிள்ளையார்!!!

மூலவர் செல்வ விநாயகர்

மொட்டைப் பிள்ளையார்

நமது பாரத நாட்டில் பண்பாடு, கலாச்சாரம், சமூக அமைப்பு, மக்கள் வாழ்க்கை முறை போன்றவற்றை வெளிப்படுத்தும் விதமாக அமையப் பெற்றவை இந்துக் கோவில்கள். பெரும்பாலான கோவில்கள் கலாச்சார அடையாளங்களாகவும், பண்பாட்டு புகலிடமாகவும் விளங்குபவை. அப்படிப்பட்ட கோவில்கள் பல அந்நியர்களான மொகலாயர்கள், ஆங்கிலேயர்களின் படையெடுப்பின் போது சேதப்படுத்தப்பட்டும், அழிக்கப்பட்டும் உள்ளன. 
   இதன் மூலம் நமது தொன்மையும், வரலாறும் அழிக்கப்பட்டுள்ளன. இதையெல்லாம் மீறி பல கோவில்கள் இன்னமும் உயிர்ப்புடன் நமது பண்பாட்டையும், கலாச்சாரத்தையும், தொன்மையையும், வரலாற்றையும், மக்களின் வாழ்க்கையையும், இறையுணர்வையும் உலகத்திற்கு பறைசாற்றிக் கொண்டிருக்கின்றன.
மொட்டைப் பிள்ளையாருடன் செல்வ விநாயகர்

மொட்டைப் பிள்ளையார் கோவில்

நாகர்

அந்த வகையில் அந்நியர்களின் படையெடுப்பின் போது தாக்குதலுக்கு ஆளாகி, சேதமுற்ற விநாயகர் கோவில் சென்னை அனகாபுத்தூரில் இன்றும் உள்ளது. மொட்டைப் பிள்ளையார் அல்லது செல்வ விநாயகர் கோவில் என்று தற்போது அழைக்கப்பட்டு வருகிறது. அனகாபுத்தூர், கன்னியம்மன் கோவில் தெரு, தண்டுக்கரை பகுதியில் இராமலிங்க சுவாமி மடத்தின் அருகே(இந்த மடத்தில் உள்ள குகையில் வள்ளலார் இராமலிங்க சுவாமிகள் தவம் செய்ததாகக் கூறப்படுகிறது.) மொட்டைப் பிள்ளையார் கோவில் அமைந்துள்ளது. அங்குள்ள சிறு குன்றின் மீது பல நூற்றாண்டுகளுக்கு முன் கட்டப்பட்டிருந்த கோவிலில் விநாயகர் அருள்பாலித்து வந்தார். 
மூஞ்சூறுவுடன் மொட்டை பிள்ளையார்
  ஆங்கிலேய படையெடுப்பின் போது இந்தக் கோவில் தகர்க்கப்பட்டதாகவும், அப்போது மூலவராக இருந்த விநாயகர் சிலை தலையின் ஒரு பகுதி உடைக்கப்பட்டதாகவும், அப்போதிருந்து இந்த விநாயகர் மொட்டைப் பிள்ளையார் என்று அழைக்கப்படுவதாகவும், இந்தக் கோவிலை தற்போது நிர்வகித்து வரும் திருமதி. பத்மா தெரிவித்தார். இவரது கணவர் கிருஷ்ணகுமாரின் தந்தை வீரபத்திர செட்டியார் என்பவர் இதற்கு முன்பு நிர்வகித்து வந்ததாகவும், அவருக்குப் பிறகு, தற்போது இந்த தம்பதியினர் கோவிலை பராமரித்து நிர்வகித்து வருகின்றனர். சிற்ப சாஸ்திரப் படி உடைந்த அல்லது குறைபாடுள்ள சிலை வழிபாட்டுக்கு உகந்தது அல்ல என்பதால் புதிதாக விநாயகர் சிலை வடிவமைக்கப்பட்டு பிரதிஷ்டை செய்யப்பட்டு வழிபாடுகள் நடைபெற்று வருகின்றன. 
 கேட்டவருக்கு கேட்ட வரும் அருளும் வண்ணம் செல்வ விநாயகர் என்று பெயர் சூட்டப்பட்டு அப்பகுதி மக்களின் வறுமை நீக்கி வளமை சேர்க்கும் விதமாக அருள்பாலித்து வருகிறார் செல்வ விநாயகர். மூலவரான செல்வ விநாயகருக்கு அருகிலேயே மொட்டைப் பிள்ளையாரும் பிரதிஷ்டை செய்யப்பட்டு வழிபாடு மற்றும் பூஜைகள் நடத்தப்பட்டு வருகின்றன. கடந்த ஆண்டு கும்பாபிஷேகம் சிறப்பாக நடைபெற்றது. 
இராமலிங்க மடம் ஜோதி
இராமலிங்க மடத்தில் பக்தர்கள்

இராமலிங்க மடம் 
இக்கோவிலுக்கு வந்து வேண்டுதல் நிறைவேறி தாங்கள் தற்போது நல்ல நிலையில் இருப்பதாக இங்கு வரும் பக்தர்கள் கூறுவதை நாமே கேட்கலாம். அப்படி வேண்டுதல் நிறைவேறிய பக்தர்களின் அன்புள்ளத்தாலும், கொடைத் தன்மையாலும் கோவில் விரிவாக்கம் செய்யப்பட்டு வருகிறது. 
  இத்தகைய சிறப்பும், பழைமையும், தொன்மையான வரலாறும் கொண்ட இந்த மொட்டைப் பிள்ளையார் கோவிலை சீரமைக்கவும், பக்தர்களுக்கு மேலும் பல வசதிகள் செய்து தரவும், பராமரிக்கவும் பக்தர்களுக்கு கோவில் நிர்வாகத்தினர் வேண்டுகோள் விடுத்துள்ளனர். அதன்படி, கோவிலுக்கு சுற்றுச் சுவர் கட்டவும், தரை அமைக்கவும், தண்ணீருக்காக போர்வெல் வசதி அமைத்து தரவும், மேலும் சில வசதிகளை செய்து மேம்படுத்த, பக்தர்கள் உதவி செய்யுமாறு கேட்டுக் கொள்கிறோம். வரலாற்றோடு நீண்ட தொடர்புடைய மொட்டைப் பிள்ளையார் கோவிலை பாதுகாக்க வேண்டியது பக்தர்களின் கடமை. இதற்காக கோவில் நிர்வாகம் பக்தர்களிடமிருந்து உதவியையும், சேவையையும் வேண்டுகின்றனர். விருப்பமுள்ளவர்கள் நிதியாகவோ, பொருளாகவோ, சேவையாகவோ வழங்கி, மொட்டைப் பிள்ளையார் கோவிலுக்கு உதவி செய்து, விநாயகரின் அருள்பெறுமாறு அன்புடன் கேட்டுக் கொள்கிறோம்.
உதவி செய்ய அழைக்கவும்:
ஓம் சிவசக்தி ஆன்மிக பக்த சபை
தலைவர் : திருமதி. சுசிலா
பொதுச் செயலாளர் : திரு. ஐயப்பன்
கோவில் நிர்வாகி : திருமதி. பத்மா
செல் : 9677211371, 7401255908

கொசுறு செய்தி:
அனகாபுத்தூர்.
   சென்னை பல்லாவரம் அருகே உள்ள இதன் தொன்மையான பெயர் ஆனைகா புத்தூர் ஆகும். அதாவது யானைகளை பராமரித்து பாதுகாத்து வந்த இடமாகும். பல்லவர்களின் காலத்தில் இந்த இடத்தில் யானைகள் பாதுகாக்கப்பட்டு வந்ததாகவும், இவ்வூரின் அருகே அடையாறும், அதனை சார்ந்த மடுவும் யானைகளை பாதுகாக்க உகந்ததாய் இருந்துள்ளது. அதனால் யானைப்படை இங்கு நிறுத்தி பராமரிக்கப்பட்டு வந்ததாகவும் கூறப்படுகிறது.
     மேலும், இவ்வூரில் பாதுகாக்கப்பட்டு வந்த சில யானைகள் அருகிலுள்ள மடுவின் நீரை முகந்து அருள்மிகு ஆனந்தவல்லி சமேத அகத்தீஸ்வரர் இறைவனுக்கு அபிஷேகம் செய்வித்தும், மடுவின் கரையில் அமைந்த நந்தவன மலர்களை தூவியும் அர்ச்சித்து பெயர் பெற்றதாக தலபுராணம் கூறுகிறது. எனவே, யானை பூஜித்த தலைவன் இறைவன் உறையும் இவ்வூர் ஆனைகாபுத்தூர் என்று அழைக்கப்பட்டு, தற்காலத்தில் அனகாபுத்தூர் என்று மருவி வழங்கப்பட்டு வருகிறது.

Friday, 17 July 2015

ஈகைத் திருநாள்!!!

அனைவருக்கும் ஈகைத் திருநாள் வாழ்த்துக்கள்!
நோன்பு பெருநாள் என்றால் என்ன?

ஓர் உண்மையைச் சொன்னால் உங்கள் விழிப் புருவங்கள் வில்லாய் வளையும்...!இஸ்லாமியர்களுக்கான இனிய பண்டிகைகள்-இனிய திருவிழாக் கள் மொத்தம் எத்தனை தெரியுமா?இரண்டே இரண்டுதான்.வியப்பாக இருந்தாலும் அதுதான் உண்மை! ஒன்று, ரம்ஜான் பண்டிகை என்று சொல்லப்படும் ஈகைத் திருநாள். இன்னொன்று, ஹஜ்ஜுப் பெருநாள் என்று சொல்லப்படும் தியாகத் திருநாள்.இந்த இரண்டைத் தவிர, வேறு எந்த ஒரு பண்டிகையோ, திருவிழாவோ இஸ்லாமியர்களுக்கு இல்லை.


அப்படியானால் முஹர்ரம், பஞ்சா, உரூஸ். சந்தனக்கூடு என்பதெல்லாம்...?

அவையெல்லாம் பண்டிகையும் அல்ல; திருவிழாவும் அல்ல. இன்னும் தெளிவாகச் சொல்லப் போனால், மார்க்கத்திற்குப் புறம்பான காரியங்கள் அவை.அவ்வளவு ஏன், இறைத்தூதர் நபிகள் நாயகம்(ஸல்) அவர்களின் பிறந்த நாளான மீலாது நபி கூட, இஸ்லாமியப் பண்டிகை அல்ல.உலக முஸ்லிம்கள் அனைவரும், ரமலான் மாதத்தில் 30 நாளும் நோன்பிருந்து, அந்த உன்னத வழிபாட்டின் நிறைவாகக் கொண்டாடுவது தான் ஈகைத் திருநாள் விழா...!அதற்கு ஏன் அந்தப் பெயர் வந்தது?அதைச் சொன்னால் நீங்கள் இன்னும் வியப்படைவீர்கள்.பிறர் கண்ணீர் துடைப்பதையும், பிறர்க்கு உதவுவதையும் மதக் கடமையாகவே - இறை வழிபாடாகவே ஆக்கியுள்ள மார்க்கம் தான் இஸ்லாம்.நபிகள் நாயகம்(ஸல்) அவர்களிடம் ஒருவர் வந்து, ""இறைத் தூதர் அவர்களே, இஸ்லாம் என்றால் என்ன?'' என்று வினவினார்.இந்த வினாவிற்கு இறைத் தூதர் என்ன விடை சொல்லி இருப் பார் என்று நினைக்கிறீர்கள்?

இறைவன் மீது நம்பிக்கை கொள்ளல் எனத் தொடங்கி இஸ்லாத்தின் அடிப்படைகளை எல்லாம் விலாவாரியாக விளக்கியிருப்பார் என்றுதானே நினைக்கிறீர்கள்?அதுதான் இல்லை.இறைத்தூதர்(ஸல்) அவர்கள் ஒரே வார்த்தையில் விடை அளித்தார்கள்."பசித்தவருக்கு உணவளிப்பதுதான் இஸ்லாம்!'"அண்டை வீட்டுக்காரர் பசியோடு இருக்க, தாம் மட்டும் வயிறார உண்பவர், இறை நம்பிக்கையாளர் அல்லர்' என்று அண்ணலார் ஓங்கி முழங்கினார்கள்.

நபிகள் நாயகம்(ஸல்) அவர்கள் இறைத்தூதராக அனுப்பப்பட்டதன் நோக்கம், மக்களின் உளப் பிணியைத் தீர்ப்பது மட்டுமல்ல, பசிப் பிணியைத் தீர்ப்பதும் தான்.அவருடைய அனைத்து அறிவுரைகளும், வழிகாட்டுதல்களும், இந்த அடிப்படையில் தான் அமைந்துள்ளன என்பதை வரலாற்று நூல்களிலிருந்து நாம் அறிந்து கொள்ளலாம்.இதே வழிகாட்டுதல் தான் ரமலான் மாதத்திலும் பளிச்சிடுகிறது."ஒரே ஒரு பேரீச்சம் பழத்தைக் கொடுத்தேனும் நரக நெருப்பிலிருந்து விடுதலை பெறுங்கள்'"ஒரு மிடறு பாலைக் கொண்டாவது நோன்பாளிக்கு நோன்பு திறக்க உதவுங்கள்'"இறை வழியில் தான தர்மங்களை வாரி வழங்குங்கள்'"வசதியுள்ளவர்கள் தங்களின் செல்வத்திலிருந்து ஜகாத்தைக் கணக்கிட்டு ஏழைகளுக்குக் கொடுத்தே ஆக வேண்டும்'-

இவை போன்ற எண்ணற்ற கட்டளைகள், நபிமொழி நூல்களில் நிரம்பி வழிகின்றன.பெருமானார்(ஸல்) அவர்களின் அதே கட்டளை தான், ஈகைத் திருநாளிலும் செயல் வடிவம் பெறுகிறது.எப்படி?பெருநாளன்று, யாரும் பசி- பட்டினியோடு இருக்கக் கூடாது என்று, இஸ்லாம் விதித்துள்ளது.அந்த மகிழ்ச்சியான நாளில், யாரும் நோன்பு கூட இருக்கக் கூடாது என்று அண்ணலார் கட்டளை இட்டுள்ளார்கள்.எல்லாம் சரி, ஆனால் கஞ்சிக்கே வழியில்லாத, கதியற்ற மக்களுக்கு ஏது பெருநாளும், திருநாளும்? அரிசிச் சோற்றுக்கு அவர்கள் எங்கே போவர்?இங்கு தான் இஸ்லாமியச் சட்டம் மிக அருமையாகச் செயல்படுகிறது.பணக்காரர்கள் மட்டுமல்ல, ஓரளவு வசதியுள்ள நடுத்தர மக்கள் கூட, பெருநாளன்று சிறப்புத் தொழுகைக்குப் போவதற்கு முன்பாக "ஃபித்ரா' எனும் பெருநாள் தர்மத்தைக் கட்டாயம் தர வேண்டும் என்பது மார்க்கச் சட்டம்.

நாம் சாப்பிடுவதற்கு என்ன அரிசியைப் பயன்படுத்துகிறோமோ, அதே தரத்தில், ஏறத்தாழ இரண்டரை கிலோ அரிசியை அல்லது அதன் கிரயத்தை, ஏழைகளுக்கு, பெருநாள் தர்மமாக வழங்கிட வேண்டும்.உங்கள் குடும்பத்தில் ஆறு பேர் இருப்பதாக வைத்துக் கொள்வோம். ஆறு பேருக்கும் தலா இரண்டரை கிலோ அரிசி எனக் கணக்கிட்டு 15 கிலோ அரிசியை ஏழைகளுக்கு வழங்கிட வேண்டும்."ஃபித்ரா எனும் இந்தப் பெருநாள் தர்மத்தை யார் வழங்கவில்லையோ, அவருடைய நோன்பு ஏற்றுக் கொள்ளப்பட மாட்டாது.

பூமிக்கும், வானத்துக்கும் இடையே அது தொங்கிக் கொண்டிருக்கும்' என்று அண்ணல் நபி(ஸல்) அவர்கள் எச்சரித்துள்ளார்கள்.இந்த தர்மம் கடமையாக்கப்பட்டதன் நோக்கம், பெருநாளன்று எந்த ஓர் ஏழையும் பசியோடு இருக்கக் கூடாது; உணவின்றி வாடக் கூடாது; பிஞ்சுக் குழந்தைகள், பட்டினியால் தவிக்கக் கூடாது ன்பதேயாகும்.அதனால்தான் இந்தப் பண்டிகைக்கு ஈதுல் ஃபித்ரு- ஈகைத் திருநாள் என்று பெயர் வந்தது.ஆம்...!ஈகைத் திருநாள் இறைவனுக்கு நன்றி செலுத்தும் திருநாள்...!பசிப்பிணி போக்கும் பெருநாள்...!வாசகர்கள் அனைவருக்கும் ஈகைத் திருநாள் வாழ்த்துகள்... !ஈத் முபாரக்!

நன்றி..
-
சிராஜூல் ஹசன் , ஆசிரியர் சமரசம்